Gústanos o papel!

Nestes tempos dixitais gústanos apreciar o tacto de cada tipo de papel, respirar a través dos seus poros, da súa rugosidade. Apreciar un papel fino como o aire,  sedoso, suave, sólido como a madeira de onde procede, ou tan ben feito que o que se imprime sobre el é máis real. Gústanos o papel polas sensacións que transmite.

A quen apreciamos o papel, o aroma que destila un libro cando o abres, o son das follas ao pasar, márcannos o tempo ao que queremos vivir. Emocionámonos ao entrar nunha biblioteca chea de historias que descubrir en cada estante e en cada páxina. Imaxinamos toda a vida que hai detrás dun libro con páxinas que o tempo xa amarelou. Gústanos imaxinar, crear, escribindo, debuxando ou simplemente facendo garabatos, na inmensidade dun papel en branco recentemente estreado.

Gústanos o papel!